• 31May

  Tidenes Vømmølfestival?

  Generell

  For ein dag og for ein folkefest. Vømmølfestivalen i Verdal er avvikla med rekordvarme, rekordoppslutning og sikkert rekordgod stemning. Hans Rotmo sine låter har spreidd sosialistisk poesi inn i hjarterota til fleire tusen sommarhungrige trøndarar.

  Eg deltok i opptoget saman med SVs tredjekandidat til Stortingsvalet, Rune Hegge, der over 100 innslag og fleire titals traktorar med morosame påfunn og hengarar sette standarden for kvelden som skulle kome.

  Etter opptoget deltok vi i parti-tevling i rævkrok, staurbæring og mjølkespannkasting. SV kom på andreplass, noko som er heiderleg innsats og meir til.

  Før folkefesten byrja på kvelden tok vi like gjerne ein raud-grøn ballongtur. Eg, Gerd Janne Kristoffersen (AP) og Ivar Vigdenes svevde høgt på gårsdagens meiningsmåling som gav SV nesten dobla oppslutning på over 11% og som hadde klart raud-grønt fleirtal.

  Utover kvelden traff eg mange kjendte og ukjendte. Prate sit laust iførrt vømmølsklede, fantastiske trønderkjoler med overdriven bruk av leppefarge, rykka dansefoten lett. Og innimellom vil folk sjølvsagt høyre kva eg meiner om ulike saker og diskutere litt politikk. Eg må jo sjølvsagt ta meg tida til det også.

  Tidlegare har eg vore på folkefesten under avdukinga av Åge-statue i Namsos. No Vømmøl. Revyfestivalen på Høylandet og spelet på Stiklestad ventar. Det gjer også mange andre martnaer, kommunedagar, store og små trønderfestivalar.

  For medan min forgjengar, Inge Ryan, blei kjendt for å besøke alle kommunane i Nord-Trøndelag så skal eg også gjere dette, men på min måte. Eg skal prioritere folkefestane, forhåpentlegvis alle, for det er min arena.

Din kommentar
• 29May

  I vømmøl å dala der va det ein gjeng

  Generell

  Vømmølfestivalen 09 er i gang! Tusenvis av trøndarar og tilreisande kler seg i vømmølstasen og lever livets glade dagar utan bekymring for kuskit og fjøs nokre dagar. I morgon er den store festdagen. Eg skal delta i opptoget med spektakulære innslag og delta på festen utover dagen og natta.

  I 14-15 tida er det duka for tevling. Eg stiller på lag saman med 3. og 4. kandidat, Rune Hegge og Margareth Halle. Vi skal konkurrere i rævkrok, staurbæring og kassestabling. Sistnevnte grein er kanskje erstatta med ei anna då det ikkje ser ut til at dei har fått løyve på grunn av faren for personsskadar. Vinnarsjansane er kanskje sånn passe. Sett bort frå Margaret er vi nokså pjuskete i slike tunge idrettar vi to andre.

  Uansett. Les du dette og er i Trøndelag, møt opp og hei på oss! Vi treng mental støtte der vi skal knive mot brautete senterpartistar og kapitalsterke høgrepolitikarar. Men vi har rutatskjort å  pågangsmot!

2 har kommentert
• 29May

  5 av 6 til Soria moria 2

  Generell

  Nord-Trøndelag kan avgjere eit tett val mellom høgresida og venstresida når nytt fleirtal skal teljast opp. Blir det like tett som det kan verke som no, vil resultatet i Nord-Trøndelag kunne vere avgjerande. Det er seks mandat frå Nord-Trøndelag. 5 er direktemandat. 1 er utjamningsmandat. I realiteten er FrP og SP sikra eitt. AP er sikra to. AP kan klare det tredje og SV kan klare vårt eine.

  Med velferdsstat, distriktsnoreg og rettar i arbeidslivet på spel er det ingen tvil om at vi må gå for fem raudgrøne mandat i fylket. Derfor må eg og fylkespartiet jobbe intensivt for å klare 12-13% for å trygge mandatet mitt og AP må håpe dei får nok til å klare utjamningsmandatet som ligg hos Venstre i dag. Dette kan vere mandatet som sikrar velferdsstaten folkens. Det er også meldinga eg fekk frå LO i Nord-Trøndelag når eg heldt foredrag om valkampen før i veka. Vi må berre vinne dette valet, vi!

Din kommentar
• 28May

  For det hainnle om å leve

  Generell

  FrP vil ha aktiv dødshjelp. KrF vil stoppe “rekrutteringa” av homofile. Det er naturleg å leve Det er naturleg for somme å elske menneska av same kjønn. Å kjempe for livet er å skape miraklar for framtida. Å kjempe for kjærleiken er å kjempe for eit opnare samfunn.

  Stortingskandidat og fylkesråd i Nord-Trøndelag, Johannes Sandstad frå KrF, går mot støtte til å etablere nettverk og møtearenaer for homofile og lesbiske i fylket fordi han er redd for at dette vil rekruttere fleire homofile. Du rekrutterast ikkje som homofil. Du kjem ut av skapet når du er klar - fordi du ér homofil. Korfor er du redd for at dei som lever med ein løyndom skal sleppe sanninga ut? Å stenge homofile inne er å jage dei ut av fylket. Eg har møtt fleire opne homofile Nord-Trøndarar i Oslo enn eg har møtt i Nord-Trøndelag. Dei kan ikkje helbredast ved bøn, men fortjener samfunnets løn.

  FrP vil hjelpe deg å døy. SV vil hjelpe deg å leve. (sitat @nisselue på Twitter). KrF vil jage deg bort frå Nord-Trøndelag om du er homo. SV vil la deg leve på bygda sjølv om du er annleis. Stortingsvalet er eit verdival. Eg vil på tinget for å vere Mennesket sin talsperson for varmare verdiar.

2 har kommentert
• 26May

  Heia damene i NTE

  Generell

  Trønder Avisa melder at damene står klar til å overta leiarposisjonar i Nord-Trøndelag Elektrisitetsverk (NTE). Det gjer meg ikkje mindre glad i samfunnsbedrifta vår i Nord-Trøndelag.

Din kommentar
• 26May

  Streik for pensjonen!

  Generell

  Det ser ut til å gå mot storstreik.

  Bakgrunnen for streiken er stortingsfleirtalets forsøk på  pensjonsran. Kluten skal vrist endå lengre i arbeidslivet og slitarane som må gå av litt tidlegare taper. Vi som er født etter 1963 taper. Kvinner taper. Lågtlønte taper. Dei som har lengre periodar med bortfall i arbeidslivet taper.

  No må regjeringa på banen og innfri krava frå fagrørsla. I denne saka er det ikkje tvil om kven si side eg står på. Arbeidsfolk, pensjonistar, ungdom!

  Ei borgarleg regjering som i praksis vil legge pensjonsordningane ut på anbud, er eit dårleg alternativ. Då kan ikkje Jens og Co drive med pensjonsran midt i valkampoppkøyringa.

  Kan nokon fortelje meg kven og kva som held igjen i regjeringa frå å gripe inn og innfri fagrørslas vikige krav?

1 har kommentert
• 26May

  Arbeidsliv og valkamp. Kva blir viktig?

  Generell

  I morgon (27. mai) er eg invitert til å snakke på LO i Nord-Trøndelag sin fagpolitiske temadag om valkampen 2009. Eg har fått mange viktige invitasjonar etter at eg blei stortingskandidat som stadig gjer meg meir priveligert. Men denne invitasjonen set eg høgast fram til no.

  Saman for arbeidet, saman for rettane. SV styrer og endrar Noreg i regjering. Men vi hadde ikkje klart halvparten av velferdsreformar og vi hadde ikkje klart å redde sjukelønsordninga som i dag og snu brutalisering av arbeidslivet til kamp for eit humant arbeidsliv utan at LO med sine snart 1 million medlemmer stod bak krava. SV i regjering er (litt sett på spissen)  ikkje slagkraftig utan reint fleirtal ELLER eit kravstort og samla LO som utfordrar til venstre for dei som har vore politikarar for lenge.

  At eg får snakke til denne forsamlinga er ein invitasjon meir enn berre representasjonen. Eg håpar nemleg at dette er byrjinga på ein langvarig dialog med fagrørsla i Nord-Trøndelag - dei med krava - eg med ansvaret som stortingsrepresentant i tjeneste for folks kvardagsliv i skole, arbeid og fritid.

  Kva synst du eg skal ta med i talen min til LO? Sjukeløn? tjenestedirektiv og kamp mot sosial dumping? postdirektiv? likeløn? kamp mot deltid? endring av permitteringsreglar? Styrking av fagopplæring? arbeidstidsreform? skattefrådrag for fagforeningskontingent? Andre ting?

2 har kommentert
• 25May

  Frykt

  Generell

  FrP skårar poeng på å fyre opp under framandfrykt for flyktningar. Summen av forslag og retoriske utspel frå landsmøtet til FrP gjer meg oppgitt. Eg blir ikkje redd for innvandrarar. Eg blir redd for FrP. Og i kjølvatnet av eit slikt mediefokus på internering og utkastingstrugslar av folk som har flykta til Noreg, går mine tankar til alle flyktningebarna som må konsumere og fortolke kva dette handlar om. Det er nok dei som opplever den største frykten fordi dei forstår at dette partiet kan få makt. Ikkje berre innvandrarbarn blir redde, men alle barn i landet som har vener i barnehagen og nabolaget frå andre land. Vi kan ikkje la Høgre og FrP få styre. Det vil skremme fleire enn skræmmarn sjøl.

12 har kommentert

« Previous Entries